Nawng E Hku Sasana jawngma langai hka kaw yawng lim si mat
Laiza Muklum, Nawng E Hku sasana jawng kaw jawng lung nga ai jawngma langai hka kaw yawng lim si mat ai lam chye lu ai.
August shata 13 ya shana de hkying 4:30pm aten daram kaw nna, Nawng E Hku sasana boader kaw nga ai jawngma marai (7), Mung Lai hka de hka sa shin ai kaw jawngma langai hka yawng lim si mat ai lam, lit nga ai ni tsun ai.
Hka yawng lim si mat ai jawngma gaw, Shadang. Jangma Mung San Awng asak (18) ning rai nna, Salang. Jangma La Myen hte Jan. Lahpai Hkawn San yan a kasha re ai hpe chye lu ai.
Ndai jawngma gaw Mai Ja Yang Muklum lawk (4) kaw nga nna, ya aten Nawng E Hku sasana boader kaw nga let, jawng lung laika hpaji sharin nga ai aten, hka sa shin ai kaw hka yawng lim si mat ai re lam chye lu ai.
Ya aten du hkra shi a hkum tsawp moi mang hpe nlu tam la shi ai rai nna, seng ang ai salang ni, mungshawa kanu kawa ni kawn mung, tam ding yang rai nga ai hpe chye lu ai.
