SNA dap shara langai hpe KIA pawng hpawm hpyen hpung ni gasat zing
Mogaung ginra dap jung shara jahkrat nga ai, SNA dap shara langai hpe KIA pawng hpawm hpyen hpung ni gasat zing madu la lu ai lam chye lu ai.
August shata 18 ya jahpawt hkying 4:00am aten daram hta Mogaung Inkyin Kung mare kaw dap jung shara jahkrat nga ai, Sam hkyeng (SNA) dap shara langai hpe KIA pawng hpawm hpyen hpung ni gasat zing madu la lu ai lam, shawnglam lit nga ai salang ni tsun ai.
Gasat gala majan byin ai hta sinat laknak arung arai nkau hpe KIA pawng hpawm hpyen hpung ni gasat zing madu la lu ai rai nna, SNA maga na sum machyi ai lam law wa ai majaw, Mogaung Ts.K.Hk (3) gumshem Myen hpyen dap kaw nna mung, laknak kaba hkrup mara gap dumbre bun ai lam ni galaw ai hpe chye lu ai.
Mogaung ginra kata SNA hpyen hpung ni, hpyen shamu shamawt hkawm ai lam ding yang galaw nga ai sha n-ga, hpyen rim lahkawn ai lam, laiwa laisa mungshawa ni hpe laja lana sawk jep ai lam ni galaw nga ai re hpe chye lu ai.
