KIA Dap Ba ( 2 ) hte Dap Ba ( 3 ) ginra hta gasat gala matut byin

KIA Dap Ba ( 2 ) Dap Dung ( 14 ) ginra, Kum Nyen Ga lahta Baluk Nawng mayan kaw shara jahkrat nga ai Myen hpyen hpung hpe, KIA hpyen hpung ni December 31 ya jahpawt hkying 7:40am aten hta sa htim gap ai kawn gasat majan byin ai lam chye lu ai.

KIA Dap Ba ( 3 ) Dap Dung ( 27 ) ginra, Dunghkung Hkyet, Marit Hkyet, Dunghkung Bum, Lung Ja Nhkang kaw nga ai Myen hpyen hpung ni hpe mung, hkying 1:05pm aten hta KIA hpyen hpung ni sa htim gap ai.

Dap Dung ( 27 ) ginra hta sha, hkying 2:08pm aten, Loi Jau Bum Muk Wa makau Man Dat lam she kaw nga ai KIA hpyen hpung ni hpe, Myen hpyen hpung ni bai sa htim gap ai lam nga ai.

Hkying 3:20pm aten hta mung, Lu Leng Ya maga na shamu shamawt lung wa ai Myen hpyen hpung hte KIA hpyen hpung ni, Maw Swi kahtawng kaba dingsa kaw ang katut gasat majan byin ai lam, shawnglam shisawk ni kawn chye lu ai.