KIA Dap Ba ( 2, 5, 10 ) ginra ni hta gasat gala majan byin
KIA Dap Ba ( 2 ) Dap Dung ( 11 ) ginra, Dum Bung maga kawn shamu shamawt lung wa ai Ts.K.Hk ( 3 ) kata na hpyen n-gun 100 daram hte KIA hpyen hpung ni, March 31 ya jahpawt hkying 5:40am aten hta Loili hka hte Majoi Rawng hka lapran Ga Hkyeng Kawng Microwave mayan kaw ang katut gasat gala byin ai lam, shawnglam shisawk ni shana wa ai.
Loili hka hte Dum Bung kaw du nga ai Myen hpyen hpung ni gaw, mungshawa ni a gumhpraw hte phone ni hpe mung, kam mara zing la kau ya ai, Loili hka mahkrai galaw ai Miwa ni hte bungli galaw masha ni mung Myen hpyen hpung ni hpe hkrit ai majaw ya aten Namti Kan La mare de wa hprawng yen nga ai lam chye lu ai.
KIA Dap Ba ( 5 ) Dap Dung ( 18 ) ginra rai nga ai, Ban Dawng mare ka-ang kaw nga ai Myen hpyen hpung ni hpe mung, March 31 ya shana hkying 7:35pm aten hta KIA hpyen hpung ni sa htim gap dat ai kawn gasat gala majan byin ai.
Mungmyit Sinli Ga ( Kachin Sub-State ) KIA Dap Ba ( 10 ) Dap Dung ( 2 ) ginra hta mung, March 31 ya shani hkying 1:15pm aten hta Dapnu ( 11 ) kata na hpyen hpung hte KIA hpyen hpung ni, Lung Wai mare hte Nam Gat hka mayan kaw gasat gala byin ai, dai hpang hkying 2:15pm aten hta numdaw kalang bai gap hkat ai lam chye lu ai.
