Shaning ningnan wunli la hpawng hte nlung nnan sha poi galaw

Moegaung ginwang, Nammana mare kaw January shata 5 ya shani kaw nna 7 ya shani du hkra, masum ya tup shaning ningnan wunli la hpawng hte nlung nnan sha poi lamang galaw ai lam chye lu ai.

Ya na zawn galaw ai lam hpe Nammana mare na Hpung Up Nhkum La Awng kaw nna tsun ai hta “Madung gaw rau nga rau pra Sam amyusha ni hte laga amyusha ni yawng gahkyin gumdin let shada chyena nna Mungdan simsa wa lu na matu yaw shada nna galaw ai lam re.” nga nna tsun ai.

Dai hpawng lamang hta Doctor Hkyet Awng ( Jinghpaw Mung Hkringmang Daju ), Salang Hkyet Hting Nan yan kaw nna mungga shaga ya ai, Sam amyusha laili laika hte htunghking salang ni kaw nna mung, mungga shaga ai lam chye lu ai.

Shani gaw ginsup lamang ni galaw nna shana na aten hta gaw yu ngwi mahkawn hte kahkrang lamang ni galaw ai, poi hta masha hkying lahkawng daram du sa ai lam chye lu ai.