Myen Hpyen ni gap dat ai laknak kaba si mungshawa ni a nta kaw wa hkrat kapaw ai majaw, mungshawa marai 5 si, marai 3 hkala
Mungmyit Sinli Ga ( Kachin Sub-state ) Kutkai Asia World shagyit ( Gate ) makau, Mawhik Hkanan mare kaw August shata 31 ya shani hkying 11:20am aten hta Myen Dapnu 88 ni gap dat ai laknak kaba si gaw, Salang Zahkung Zau Bawk hte Salang Hanggau Gyung Dau ni a nta kaw wa hkrat kapaw ai majaw, mungshawa marai 5 asak si sum mat nna, marai 3 hkala hkrum ai lam chye lu ai.
Si sum mat ai ni gaw, Jan Hpaugun Htoi Ja asak 37 ning, Shayi Zahkung Nang Nu Pan asak 14 ning, Shadang Zahkung Zau Hkun Lat asak 10 ning, Jan Lasham Lu San Aung asak 18 ning hte Ma Lasham Hkawn San shata 4 ni re.
Hkala hkrum ai ni gaw Salang Gyung Hkawng, Shadang Bawk La hte Shayi Roi Bu ni rai nna marai 2 gaw hkala sawng ai majaw Lashio tsi rung de htaw yu wa sai. Ngam ai marai 1 gaw Kutkai mungshawa tsi rung kaw tsi tsi hkam la nga ai lam chye lu ai.
Si sum mat sai ni hpe September shata praw 1 ya shani hta Kutkai Hkristan lup ding lup wa kaw akyu hpyi makoi mayang na re lam, buga na Salang langai shana wa ai.
Dai hpawt hkying 6:00am aten hta Kutkai daw 8 Htunghking Manau Wang makau kaw TNLA hte Myen Hpyen Dapnu 99 ni gasat gala majan byin ai hta Myen Hpyen Dap ni gaw, mare de laknak kaba hkrup mara gap bun ai majaw mungshawa ni si, hkala hkrum ai re lam, Salang wa matut tsun ai kawn chye lu ai.
