Wunpawng Mungdan Shanglawt hpung Pati shamu shamawt ai hpawng lamang galaw

Wunpawng Mungdan Shanglawt hpung kawn woi awn nna Pati shamu shamawt ai hpawng lamang hpe October shata 7 ya jahpawt hkying 9:00am ten kaw nna shana daw hkying 3:30pm aten  laman hta Laiza Muklum, Lahta tsang jawng, Rawt Ning Hkawng Gawknu kaw galaw ai lam chye lu ai.

Wunpawng Mungdan shanglawt hpung pati grau nna rawt jat wa na matu hte grau nna myit pyaw kabu gara wa lu na matu yaw shada let jawng hkan, buga shara shagu hkan party shamu shamawt ai lam hpe shaning shagu galaw ai rai nna, matut nna rawt jat galu kaba wa hkra galaw sa wa na re lam Wunpawng Mungdan Shanglawt hpung ninggawn daju pati komiti Amu Madu Du Kaba Yijawng Dai Hkawng tsun ai.

Hpawng lamang hta yu ngwi mahkawn hpe Dukaba Yijawng Dai Hkawng hte Saranum Majap Seng Hkawn kaw nna sharin ya ai hpang Wunpawng Mungdan Shanglawt Asuya Magam gun ningbaw ningla ni a sumla hpe madun ai lam galaw ai.

Lakjat hku nna sharin ya ai ni gaw Salang kaba Labang Doi Pyi Sa, Du kaba Nbang Bum Sin Wa, Sara Kaba Sumlut Gam, Du kaba Ura Naw Tawng ni rai nna, Sharin ga baw ni gaw Myu tsaw mung tsaw myit, Wunpawng labau, Htunghking, Ginru ginsa labau, Hkai rem, Hkamja lam hte Hpaji lam ni hpe sharin ya ai re lam chye lu ai.

Daini na hpawng hta Laiza lahta tsang jawng, Laiza lapran tsang jawng hte Nawng E Hku jawng kaw hpaji sharin hkamla nga ai tsang 8 lahta na jawngma ni hte Magam gun jawng Sara, Saranum ni yawng marai 400 daram sa du shang lawm ai lam chye lu ai.