Hpakant ginra gasat gala majan byin

Hpakant ginra hta KIA hte gumshem Myen hpyen dap ni gasat gala majan byin nga ai lam chye lu ai.

April shata praw 2 ya jahpawt hkying 5:00am aten daram kaw nna, Hpakant Maw Wan Kaba, Maw Wan Kaji, Sut Bum, Mashi Kahtawng grup yin ni hta KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, shawnglam lit nga ai salang ni tsun ai.

Gasat gala majan byin nga ai hta gumshem Myen hpyen dap ni nbungli hte bawm wa jahkrat gap gasat ai sha n-ga, Hpakant Byuha kawng kaw nna mung, laknak kaba ni hte hkrup mara gap bun nga ai lam chye lu ai.

Gumshem Myen hpyen dap ni gap dat ai laknak kaba si mungshawa ni nga ai dum nta hkan wa hkrat kapaw ai majaw, mungshawa hkra hkala hkrum ai lam ni nga ai hta marai kade hkra hkala hkrum ai lam tup hkrak nchye lu ai rai nna, ya aten lahkawng maga hpyen masa matut shaja hkat nga ding yang re ai hpe chye lu ai.