Hpare ginra na mung mare masha ni hkawm sa hkawm wa yak hkak hkrum nga

Miwa mungdan Chingkyi kaw nna Hpare hkyet masat shadaw 6 du hkra December shata praw kaw nna Miwa Asuya kawn Modo lam nep hpang wa ai majaw, Modo lam gan pat da nna mare masha ni hkawm sa hkawm wa yak hkak nga ai lam na chye lu ai.

Ya ten Modo kaji kaba ni hpe n shalai ai, Cycle ni hpe sha shalai ai majaw, mung mare masha ni hkawm sa na matu yak hkrak nga ai sha n-ga, Hpare ginra gaw katsi dik ai ginra re majaw, jahpawt manap jau jau hkawm sa ra ai raitim, aten hpe shana miwa hkying 7:00pm kaw nna, jahpawt miwa hkying 7:00am aten du hkra hte shani ga-ang shat sha ten hta sha masat da ya re majaw hkawm sa hkawm wa na matu yak hkak dut dang ai lam ni nga ai re nga nna ginra masha ni shana wa ai kaw na chye lu ai.

Modo lam nep ai gaw shata mi daram na wa na re majaw, ndai laman hta modo kaji kaba ni hpe mung pat hkum da ai re lam, lam pat ai gaw nhtoi 5,6 ya daram na sai sha n-ga, masat da ya ai aten chyarang hpe nhkan nang nhkan sa ai mungshawa ni hpe tsun sadi jaw ai lam nga ai re.

Ya aten Shinggau Hpare ginra na hpyen yen mungshawa ni gaw laiwa sai aten na zawn garum ningtum lam nlu mat ai majaw, nshung ladaw rai nga ai hte maren, hkyen ni hkrat katsi dinglai nna, ju hpun ni mayak nga ai hte lum palawng hpun nba ni mung hkyak hkyak ra kadawn nga ai lam na chye lu ai.