3 lang na Lung Seng madun poi galaw

Nhprang Sut Rai Hpaga hpung ni (ေက်ာက္မ်က္ရတနာ လုပ္ငန္းရွင္မ်ားအသင္း) kaw nna woi awn nhtawm, lung seng madun ai poi lamang hpe February shata 24 ya shani kaw nna 28 ya shani du hkra Myitkyina, Shatapru mare Jak Rung shara kaw galaw na re lam chye lu ai.

“Lung Seng madun poi hta Myen Mung gumhpraw hte sha dut mari ai lam galaw ai re majaw, Mungdan kata na lung seng hte seng ai hpaga la ni sha dut mari mai ai rai nna, Miwa Gumsan Mungdan sha n-ga kaga maigan masha ni sa du ai raitim, dut mari na ahkang njaw ai hte ndai lung seng dut mari ai lam gaw Mungdan kata na ni a matu sha re” nga nna Du Wa Lahkri La Awng tsun ai.

Jinghpaw Mung kaw lung seng pru ai re majaw Myitkyina kaw lung seng madun poi galaw ai re, Lung Seng hpaga hpung ni kaw nna mung ya aten hta anhte ginra kaw Lung Seng hpe Maigan Gumhpraw hte dut na ahkang nnga ai raitim, htawm hpang e Maigan gumhpraw hte mai dut ai gat lawk byin wa hkra galaw na matu yaw sing da ai re lam, Du Wa Lahkri La Awng tsun ai ai kaw na chye lu ai.

Lung Seng madun poi hta sa yu sa mari ai ni hpe gaw madun poi wang kata de shang lu na matu du gali hpe rigister galaw ya nna shang ahkang jaw ai re hte lung seng madun poi hta Lung Seng sa dut ai Company ni gaw 6 daram nga ai hte lung seng lawk 600 daram shang lawm ai re lam chye lu ai.

Lung Seng dut poi hta license lu da ai ni sha dut mari ai ahkang nga ai rai nna, ya aten lung seng sa yu sa mari ai masha ni marai 300 jan du nga sai re lam chye lu ai.