Nawku Hpung ningbaw ningla ni hkrumzup hpawng galaw
Myitkyina Hkristan Kongsi (MCC) kawn woi awn nna, Nawku Hpung ningbaw ningla ni hte Myen Mung Kahtawlik nawku hpung kaw na Saradaw tsang hta lit la nga ai Bishop ni a hkrumzup hpawng hpe Myitkyina St. Columbus nawku jawng wang kaw March shata 18 ya shana daw hkying 5:00pm aten hta galaw ai lam chye lu ai.
“Hkrumzup hpawng hta nawku hpung hte seng ai lam, amyusha ni a shawng lam, gahkyin gumdin nna gara hku hkrang shapraw sa wa na lam hte Hpyen yen kanu kawa ni hte seng ai lam hpe bawngban la lu sai re” nga nna hkrumzup hpawng hta shang lawm ai Salang Hkawn Zau Jat tsun ai.
Hkrumzup hpawng hta Saradaw Archbishop Paul Zinghtung Grawng, Saradaw Bishop Philip Lasap Ze Hkawng (Lashio), Saradaw Bishop Lucas Jumhpauk Dau Ze (Lashio), Saradaw Bishop Raymond Sumlut Gam (Manmaw) hte Saradaw Francis Daw Tang (Myitkyina) ni sa du shang lawm ai re.
MCC maga na Sara Kaba ni gaw Rev. Dr. Hkalam Samson (KBC Ningbaw), Rev. Nba Zau Awn (Anglican), Ningbaw/la Kadu Zau Ja (ICM) hte Salang Hkawn Zau Jat (WMR Amu Madu) ni sa du shang lawm ai lam chye lu ai.
