Gwi Hka Maw ga gyi nna asak si sum masha ni a moimang tam ai lam hpe jahkring kau sai

Hpakant, Gwi Hka Maw ga gyi nna asak si sum ai masha ni a moimang tam ai lam hpe July shata praw 5 ya shani jahkring kau sai hte moimang yawng 182 hpe mu tam ai lam chye lu ai.

Lu shaw da ai moimang ni hpe makoi mayang ai lam galaw ngut sai rai nna, ndai moimang 182 kaw na Wunpawng amyusha marai 15 lawm ai hta, marai 3 a moimang hpe gaw nmu tam ai re lam chye lu ai.

Myen Mung Asuya komiti ni kaw nna July shata praw 5 ya shani wa du nhtawm, asak si sum ai htinggaw langai mi hpe gumhpraw kyats 500,000 (Sen Manga), hkala hkrum ai masha marai langai mi hpe kyats 300,000 (Sen Masum) garum jaw ai lam chye lu ai.

Myen Mung Asuya kaw nna Lung Seng company ni hpe mara shagun ai lam nnga ai re hte si hkala hkrum ai ye mase tam masha ni gaw lu lawm mayu ai law hpa myit a majaw, ya na zawn byin ai re ngu nna wa tsun kau da ai re lam, Wunpawng Amyusha Zinlum Hpung Amu Madu Salang Dashi Naw Lawn tsun ai.

“Ya na zawn si hkala hkrum ai ye mase tam masha ni gaw lu lawm mayu ai law hpa myit a majaw re nga nna commission ningbaw wa dai hku wa tsun kau da ai majaw, ndai kaw galaw lu galaw sha nga ai Rudi masha ni gaw myit npyaw rai taw nga ai. Ya shanhte company gaw nhkun sung ai du hkra htu kau da nna, gyi mai na hku shanhte galaw da ai hpe gaw mara n shagun nna anhte matsan mayan rai nna tam lu tam sha ai ni hpe she mara shagun mayu ai rainga ndai asuya gaw” nga nna tsun ai.

Asuya kaw nna company ni hpe jep chyoi ai lam nnga ai sha n-ga, company ni mara nlu ai lam tsun da ai re, ndai zawn manghkang byin ai gaw company ni hta madung lit nga ai ngu mungshawa ni mu mada ai lam, Myen Asuya Salang ni Hpakant lung wa ai shaloi Rudi amyusha Salang ni hte nhkrum ai sha, Gwi Hka mare kaw nga ai mare Salang lahkawng hte sha hkrum nna bai yu mat wa ai majaw, mung shawa masha ni myit npyaw nna asuya hpe ninghkap ai hku nna ndau laika shapraw sa wa na lam, Salang Dashi Naw Lawn matut tsun ai.

 “Maw ga gaw asuya ni tara upade gawnhkang ai lam nnga ai rai malu ai, ya na zawn company ni hte အက်ိုုဳးတူ galaw ai re majaw, commission ni mung company ni hpang de lawm ai ngu mu mada ai, mungshawa ni galaw lu galaw sha na matu shara jahkrat ya na nga tsun ai raitim shara jahkrat ya ai lam nnga ai, nhprang upade hpe mung shanhte nshapraw ma ai, shingyim ahkaw ahkang mung tup hkrak nlu ai, grau nna myi man kaji ai gaw anhte amyusha ni rai nga ai, madu rai nga ninglen anhte madu ni hte n jahkrup ai nbawng ban ai majaw, asuya hpe gaw anhte ninghkap nan ninghkap na ngu myit da ga ai” nga nna tsun ai.

Hpakant ginra kaw laiwa sai ten hta Jinghpaw Wunpawng amyusha ni yi, sun galaw let, gat dut sha ai kan bau magam bungli galaw sha nna shanu nga ai hpang, kaga amyu sha ni hpaga galaw let du shang wa ai ginra re hpe mung chye lu ai.

Photo Credit.