Hpakant ginra hta nbungli hte gap gasat ai lam galaw nga

Hpakant ginra hta gumshem Myen hpyen dap ni nbungli hte gap gasat ai lam galaw nga ai hpe chye lu ai.

May shata praw 8 ya jahpawt hkying 10:00am aten daram hta Hpakant Lawnghkang na lung seng company wang langai kaw gumshem Myen hpyen dap ni Jet nbungli langai hte bawm wa jahkrat gap gasat ai lam, ginra masha ni tsun ai.

Hkying 12:10pm aten daram hta mung, Hpakant Kate mare kaw gumshem Myen hpyen dap ni Jet nbungli hte bawm wa jahkrat gap gasat ai rai nna, mungshawa hkra hkala ai lam nga nnga hpe nchye lu ai re lam, ginra masha ni matut tsun ai.

Hpakant ginra hta ya aten, gumshem Myen hpyen dap ni gaw nbungli hte gap gasat ai lam ni galaw nga ai sha n-ga, laiwa laisa mungshawa ni hpe mara kata gap sat ai lam, jahkrit shama sawk jep ai lam ni mung galaw nga ai majaw, dai ginra na mungshawa ni galaw lu galaw sha, hkawmsa hkawmwa ai lam hta hkrit tsang let, hkawmsa nga ra ai lam chye lu ai.