Ninggawn mungmasa lam-yan sharin achyin wunkat galaw ngut

Pati shamu shamawt woi awn komiti ni woi awn nhtawm, ninggawn mungmasa lam-yan sharin achyin wunkat hpe July shata 20-30 ya laman Laiza Lahta Tsang Jawng, Rawt Ninghkawng Gawknu kaw galaw la lu sai re.

Wunkat hpe sharin hkamla ngut sai sharin sara/num ni gaw ninggawn mung masa lam-yan hpe hpaji jawng tsang 7 lahta na jawngma ni hpe sharin ya na re hte lawu tsang daw na jawngma ni hpe gaw Makawn hte Ga shagawp ni sharin ya na re lam chye lu ai.

Wunkat hta Dingda Ginwang Ginjaw, Sadung Ginwang, Alen Bum, Je Yang, Bum Tsit Pa, Lana Zupja hte Mai Ja Yang Sara Dakkasu jawng kaw na sharin sara/num ni marai 39 sa du sharin hkam la ai lam chye lu ai.

Ninggawn mung masa lam-yan hte pati a gaw da ai tara lam hpe Salang Kaba Doi Pyi Sa kaw nna madung litla sharin ya ai rai nna, ninggawn mung masa lam-yan hpe sharin hkam la ngut sai sara/num ni mung tutut jawng ni hta jawngma ni hte magam gun manaw manang ni hpe garan kachyan gin len ya na hpe kam dat sai lam, Ninggawn Mungmasa Sharin Achyin Shabyin Shatai Komiti Ningbaw Sara Kaba Marip Naw Htoi tsun ai.

“Sara/num ni mung ninggawn mung masa hkrak rai nhkam la ai shaloi gaw bungli galaw ai kaw mung grai ningra ai lam mu mada lu ai, grau nna tinggyeng shanang wa ai lam ni nga ai, shanhte nan ninggawn mung masa hpe nhkawn hkrang jang shanhte sharin dat na Ma ni hpe hkawn hkrang hkra ma nchye tsun dan ai, ga si ga ngau nkau ni mung Myen ga grau law lang taw ai lam byin ai re majaw, ndai lang na wunkat gaw tang du ai hte sharin dat sai, sharin hkamla na sai ngu kam ai” nga nna tsun ai.

Matut nna Sinna Dingda Ginwang Ginjaw, Dingdung Ginwang Ginjaw hte Sinpraw Dingdung Ginwang Ginjaw kaw na sharin sara/num ni hpe mung ninggawn mungmasa lam-yan sharin achyin wunkat jaw sa wa na lam chye lu ai.