Laiza Muklum kata nhtoi lai ai gun rai malu masha ni hpe jep joi jasan lam galaw

Wunpawng Mungdan Shawnglawt Asuya, Laiza Muklum Hkamja Dap kaw nna madung lit la nhtawm, December shata praw 3 ya kaw nna praw 4, lahkawng ya tup, Laiza Muklum kata aten lai gun rai malu masha ni hpe jep joi jasan ai lam galaw nga ai re.

“Ndai lamang galaw ai yaw shada lam gaw, nhtoi lai ai lusha nre sha, kaja ai lusha ni hpe mari sha lu na matu re. Madung gaw jak rung jak rai kaw nna shapraw ai lu sha ni hpe shi a masat da ai aten laman kaw sha dut lu dut sha lu na matu ngu yaw shada let galaw ai re” nga nna Laksan Muklum Ningtau Hkamja Du Magawng La Din tsun ai.

Mungchying mungshawa ni kaw nna mari lu mari sha wa ai shaloi mung nhtoi lai ai lusha ni hpe hkrak chye yu nna san jep ai hte la sha chye ga, gat dut ai mungshawa ni mung nhtoi nlai ai malu masha ni hpe dut ya ga, bai nna rau nga rau pra myusha shada re majaw nhtoi lai sai ni hpe gaw mai nhtang ai rai jang nhtang kau ga, bai nna tinang lata kaw nan jahten shaza jasan kau na hpe mung hpyi shawn mayu ai, nga nna Ningtau Hkamja Du hpaji jaw tsun da ai re.

Aten lai gun rai malu masha hpe jep joi ai lam hta Muklum Hkamja Dap, Balik Dap ni hte Muklum kata na Magam Dap ni pawng hpawm nhtawm jawm galaw ai re hte Muklum kata nga ai gat seng gat lawk, beauty salon, lu sha seng ni hte tsi jaw gawk shagu hta jep joi lam galaw nga ai re.

Lai wa sai shaning ni hta gaw nhtoi lai ai gun rai ni hpe mu jep ai rai yang gumhpraw dam gayet ai raitim, daining gaw mungshawa ni yak hkak ai lam hta hkan nna gumhpraw dam gayet ai lam hpe n galaw sai sha gun rai ni hpe jep jasan ai lam sha galaw ai hpe chye lu ai.

Laiza Muklum kata nhtoi lai ai gun rai malu masha jep joi ai lam hpe laning mi hta lahkawng lang galaw ai rai nna, laiwa sai February shata hta mung langai lang hku nna galaw sai lam chye lu ai.