Hpaji Du, Jawng Up ni hpe JNRM masing hte seng ai TOT wunkat jaw hpawng galaw

Ginjaw Ginra Ginwang Ginjaw kata, Laiza Muklum kata na Hpaji Du, Jawng Up ni hpe JNRM (Jawng Ningja Rawtjat Masing) hte seng ai TOT (Teacher Of Training) wunkat hpe January shata 13 ya shani Laiza Hotle hta 3 ya wunkat jaw nhtawm, 16 ya shani kaw nna, Je Yang IDPs Lapran Tsang Jawng hta 3 ya ta tut bungli shang ai lam chye lu ai.

“Mungdan ting na jawng ni ningja rawt jat wa na lam, sharin a chyin lam, uphkang woi awn lam, kanu kawa ni a shang lawm lam, ja gumhpraw hpareng hparan lam, jawngma ni a chye chyang lam, jawng dum nta hkang zing makawp maga lam ni yawng hkra rawt jat wa na matu yaw shada ai lam re” nga nna Ginjaw Hpaji Dap Ningtau Amu Madu Sara Kaba Lahtaw Zau Hkyen tsun ai.

Ginjaw Hpaji Dap kaw nna woi awn galaw let, shang lawm sharing hkamla sai Hpaji Du, Jawng Up ni yang gaw tinang jawng de nga ai sara, sarama ni hpe bai wa sharin ya let jawngma ni hte jawng rawt jat kalu kaba wa na matu galaw mat na lam hpe sara matut tsun ai.

Ndai zawn wunkat jaw ai lam hpe matut nna mung Wunpawng mungdan hta nga ai jawng yawng hta galaw sa mat wa na rai nna, wunkat hta shang lawm ai hpaji du, jawng up sara, sarama ni yawng 50 daram re lam chye lu ai.

JNRM hte seng ai TOT wunkat ni hpe 2019, 2020 hpaji ladaw kaw nna galaw hpang ai dai ning hte rai yang 2 lang rai sai lam chye lu ai.