Lung Dung Mare makau kaw gasat gala majan byin
Hpakant KIA Masat (9) Dap Ba, Masat (26) Dap Dung ginra hta shamu shamawt chyinglau hkawm ai, gumshem Myen hpyen dap hte Sam Hkyeng (SNA) pawng hpawm hpyen hpung ni hte KIA pawnghpawm hpyen hpung ni gasat gala majan byin ai lam chye lu ai.
KIA Masat (26) Dap Dung ginra, Lung Dung Mare shingdu kawng langai kaw KIA pawng hpawm ni shara jahkrat nga ai hpe, March shata 24 ya jahpawt hkying 9:00am aten kaw nna shana maga hkying 3:00pm aten du hkra gasat gasat poi byin ai re lam, shawng lam na lit nga ai salang langai tsun shana wa ai kaw na chye lu ai.
“Myen tai hpyen ni hte Sam Hkyeng (SNA) ni anhte kaw na ni shara jahkrat nga ai Lung Dung mare shingdu kawng marawt de shamu shamawt htu lung wa ai majaw gasat poi byin ai re” nga nna tsun ai.
Ya mung hpyen masa shaja hkat nga ding yang re gasat poi gaw, matut nna naw byin wa mai ai lam, matut tsun ai. KIA Masat 8 Dap Ba ginra, Katha maga de mung gasat gala majan laja nga ai lam chye lu ai.
Katha Muklum hpunggyi jawng kaw hpyen koi yen nga ai mungshawa ni hpe March shata 20 ya shani gumshem Myen hpyen ni nbungli bawm jahkrat gasat ai majaw, mungshawa ni law law asak si sum, hkala hkrum ai lam, ginra shiga lawk kaw na chye lu ai.
