Gumshem Myen Hpyen Dap ni mungshawa ni nga ai makau grup yin de sinat kaba hkrup mara gap bun ai majaw mung mare masha ni hkrit tsang nga
KIA Masat (3) Dap Ba, Masat (1) Dap Dung ginara, Man Je mare makau kaw dap jung shara jahkrat nga ai Gumshem Myen Hpyen Dap, Hk.M.Y (601), (319) dap kawn mungshawa ni nga ai makau grup yin de sinat kaba hkup mara gap bun ai majaw mung mare masha ni hkrit tsang nga ai lam chye lu ai.
June shata 9 ya shana hkying 7:00pm aten daram hta gaw Man Je Pyin Oo Lwin lawk hte Jinghpaw lawk ni yi sun hkau na galaw sha nga ai maga de sinat kaba gap bun ai majaw mungshawa ni a dum nta rung rai nkau hten za hkrum mat ai rai nna, June shata 10 ya jahpawt hkying 7:00am aten hta mung hkrup mara bai gap bun ai lam, Man Je mare na salang langai tsun ai kaw na chye lu ai.
KIA Masat (6) Dap Ba npu, Masat (9) Dap Dung ginra hta Kutkai kawn lagaw lam hte pru wa ai Myen hpyen hpung ni hpe June shata 9 ya shana maga hkying 3:00pm aten KIA Dap Ba (4) hte Dap Dung (39) pawng hpawm hpyen hpung ni Ga Leng lam numshe grup yin kaw bawm hte hkap gap gasat ai.
KIA Masat (5) Dap Ba npu, Masat (19) Dap Dung ginra hta mung, Daw Hpum Yang Hk.L.Y (142) dap kawn Laja Yang maga de pru wa ai n-gun (40) daram hte arung arai htaw Mawdaw (14) hpyen hpung ni hpe June shata 9 ya shani hkying 10:10am aten KIA Masat (2) mungshawa hpyen hpung ni Mung Lai Hka mahkrai makau kaw sinat kaji kaba hte hkap gap ai lam chye lu ai.
