Gumshem Myen hpyen dap ni hpe KIA ni sa htim gap
Mungmyit Sinli Ga, (Kachin Sub-state), KIA Masat (6) Dap Ba, Masat (9) Dap Dung ginra, Namhkai Hka mahkrai sin ai Gumshem Myen hpyen dap hte Mung Baw hka mahkrai sin ai Gumshem Myen hpyen dap ni hpe July shata 29 ya shani hkying 1:00pm aten kaw nna hkying 2:00pm aten laman KIA hpyen hpung ni sa htim gap ai lam chye lu ai.
KIA Masat (5) Dap Ba, Masat (3) Dap Dung ginra, Waimaw Mading mare makau na Gushem Myen hpyen dap Hk.L.Y (58) dap hpe KIA Masat (3) Dap Dung hpyen hpung ni July shata 29 ya shana hkying 10:30pm aten kaw nna hkying 11:00pm aten laman sa htim gap ai hpang, July 30 ya jahpawt hkying 1:00am aten hta Gumshem Myen dap kawn Ginjaw Ginra, Laiza grup yin de laknak kaba hkrup mara gap bun ai re.
KIA Masat (2) Dap Ba, Masat (11) Dap Dung ginra, Danai Lido lam ntsa dap jung shara la nga ai Gumshem Myen hpyen dap gate hpe mung, July shata 30 ya jahpawt hkying 3:00am aten hta KIA hpyen hpung ni sa htim gap ai lam chye lu ai.
July shata 29 ya shani hkying 10:50am aten hta gaw, Daw Hpum Yang Hk.L.Y (142) dap kawn pru wa ai hpyen n-gun (20) daram hte arung arai htaw Modo (5) hpung ni hpe KIA hpyen hpung ni Na Lung hte Hka Ya Gate lapran kaw bawm hte hkap shingla gasat ai lam, shawng lam na lit nga ai salang ni kawn chye lu ai.
July shata 28 ya shani hta mung, KIA Masat (36) Dap Dung ginra, Nawng Hpai mare ntsa kaw Hk.M.Y (315) dap na Myen hpyen n-gun (59) daram hte Kokang MNDAA hpyen hpung ni numdaw (2) lang gasat poi byin ai lam chye lu ai.
