KIA Masat (9) Dap Dung ginra hte Masat (27) Dap Dung ginra hta gasast gala majan matut byin

Mungmyit Sinli Ga (Kachin Sub-state), KIA Masat (6) Dap Ba, Masat (9) Dap Dung ginra hta February shata praw 10 ya jahpawt hkying 9:00am jan aten hta Kutkai hte Namhpaka lapran, Nam Hpalun Bum Hpahkyip mare bu hkrawp sun mayan kaw, gumshem Myen hpyen hpung ni hte KIA ni gasat gala majan matut byin ai lam chye lu ai.

Gumshem Myen hpyen dap Hk.L.Y (45) ni hte February shata praw 9 ya shani hta mung, Nam Hpalun, Udang kawng maga de gale pru wa ai kaw, KIA hte gasat poi byin ai re.

Ndai gumshem Myen hpyen hpung ni gaw, Lashio maga na lung wa ai Myen hpyen modo hpung ni hpe shim lam ya ai hpyen hpung ni rai nna, Shukhintar kaw nga ai gumshem Myen hpyen ni mung, laknak kaba hkrup mara gap bun ai lam, shawng lam na lit nga ai salang ni tsun dan ai.

KIA Masat (3) Dap Ba, Masat (27) Dap Dung ginra, Hka Kan, Lu Len Yang hte Bangkyi Hkyet mayan hta shamu shamawt du nga ai, gumshem Myen hpyen ni hte KIA ni, February shata 10 ya shani hta mung gasat poi matut byin ai lam chye lu ai.

Gasat poi hta gumshem Myen hpyen maga si hkala nga ai rai nna, machyi hkala masha ni hpe Manwin hkran hku htaw la nhtawm, Namhkam tsi rung maga de sa da ai lam, ginra shi sawk ni kaw na chye lu ai.

KIA Masat (27) Dap Dung ginra hta ya aten shamu shamawt chying lau du nga ai, gumshem Myen hpyen dap ni gaw, Hk.L.Y (47), Hk.L.Y (242), Hk.L.Y (250), Hk.M.Y (319) hte Hk.M.Y (601) na pawng hpawm hpyen hpung ni re hpe mung chye lu ai.