Mungkan makau grupyin masat n’htoi lamang galaw
Mungkan makau grupyin masat n’htoi lamang hpe June shata praw 5 ya jahpawt hkying 6:00am aten hta Nawng E HKu Sasana Jawng wang kaw galaw la lu sai.
Dai ni na lamang hta Beat Plastic Pollution ngu ai ga baw hte CSO, NGO, Municipal ni pawng hpawm nna, woi awn galaw ai re.
Mungkan makau grupyin masat n’htoi lamang galaw ai a yaw shada ai lam hpe Sr. Seng Htoi Nan ya na zawn tsun ai.
“Anhte gaw jarit mayan re majaw anhte ni ndai plasatic hte seng ai hpe hkrup mara lang taw ai ni mung law law nga ai rai nna, maza ni hpe shi hte shi ladat jaw jaw kabai ai lam nnga ai hpe mu mada ai. Jarit mayan hta shanu nga ai jawngma ni, kanu kawa ni, CSO ni yawng pawng hpawm na galaw yang makau grupyin san seng tsawm htap wa na re.”
Laiza hte Woi Chyai kata na maza ni hpe hta ai lam ni, hpun hkai ai lam ni, plastic hpe shayawm na matu hpa baw ni mai galaw ai ngu ai ga baw hte hpaji jaw ai lam ni galaw ai.
Mungkan makau grupyin masat n’htoi hpe 1974 ning kaw na galaw wa ai rai nna, dai ni lamang hta gaw Nawng E Hku Sasana jawngma ni, CSO, NGO, Municipal hte Makan dap, Magam Dap na mungshawa ni sa du shang lawm ai lam chye lu ai.
