Gumshem Myen hpyen ni gap dat laknak kaba mare kaw wa hkrat ai majaw, mungmasha marai (1) asak si sum nna, marai (3) hkala
Mungmyit Sinli Ga (Kachin Sub-state), Namhpakka kaw dap jung nga ai, gumshem Myen hpyen dap Hk.L.Y (123) dap ni, July shata 18 ya shana daw hkying 5:30pm aten hta laknak kaba hkrup mara gap shadam ai majaw, mungshawa marai (1) asak si num nna, marai (3) hkala hkrum ai lam, ginra masha ni kaw na chye lu ai.
Namhpakka Zi Dabang na nta langai kaw pala si wa hkrat kapaw ai majaw, Jan. Gadu Hkawn Nan Asak (47 ning) hkala, kasha shadang Hpauyam Naw Pa Asak (15 ning) Asak si sum, Kashu Brang San Awng Asak (9 ning) hte saranum Merry Seng Nan Asak (21 ning) ni hkala ai re lam chye lu ai.
Hkala hkrum ai machyi masha ni hta Jan. Gadu Hkawn Nan, Shd. Hpauyam Naw Pa hte Shd. Brang San Awng ni gaw, Kutkai tsi rung kaw tsi tsi hkamla nga ai ten, Shd. Hpauyam Naw Pa gaw, July shata 18 ya shana hkying 9:25pm aten hta asak si sum mat ai rai nna, saranum Merry Seng Nan gaw, Namhpakka kaw naw re lam, lit nga ai salang ni tsun ai kaw na chye lu ai.
July shata 18 ya shana maga hkying 4:00pm aten daram hta KIA Masat (6) Dap Ba, Masat (9) Dap Dung ginra, Hkumung Kawng Ra mare makau kaw, gumshem Myen hpyen dap hte KIA ni gasat gala majan byin ai lam, ginra shiga lawk kaw na chye lu ai.
Gumshem Myen hpyen dap, Hk.L.Y (123) ni gap dat ai laknak kaba si Hkumung mare kaw wa hkrat kapaw ai majaw, mungshawa nta langai mung wan hkru mat ai raitim, masha hta hkala nba gaw nnga ai lam na chye lu ai.
၎
င
၎
၎
