သုတမြစ်ဝှမ်း laika hti dum hpaw hpawng galaw
Laiza Muklum Woi Chyai kaw သုတမြစ်ဝှမ်း laika hti dum hte Journal shi laika htuk shabra ai hpaw hpawng lamang hpe March shata 29 ya shani galaw ai lam chye lu ai.
Laika hti dum hpaw ai a yaw shada lam hpe Dr. Aung Kyaw Myint ya na zawn tsun ai hta
“Machye machyang hte zai ladat ni makau grup yin de chyam bra wa lu hkra ramma ni hte jawngma ni zai ladat ni hpe chye jai lang na matu, laili laika hte mungshawa ni hpe ni kahtep shangun mayu ai, mungkan hte shingdaw lu na matu laika hti ai akyang lailen hpe sharawt shatsaw shangun mayu ai hte htunghking hpe sharawt shatsaw mayu ai yaw shada lam hte hpaw sa wa ai re” nga nna tsun ai.
Shi laika ni hpe bat lahkawng hta kalang htuk shabra mat wa na rai nna, KIO uphkang ginra hte tinang zing madu la lu sai, Sagaing ginra ni de dut shabra mat wa na re ai lam chye lu ai.
Laika hti dum hpaw sa wa na matu laiwa sai 2025 ning kaw nna hkyen lajang hpang wa ai hta shi laika hpe 2026 ning March shata 29 ya shani kawn, dut shabra hpang nga sai rai nna, shi laika ni hpe Laiza Muklum Babylon laika dut shabra seng hte Woi Chyai nta number 135 kaw mai mari hti sai lam chye lu ai.
