Shwegu hpyen man de, gumshem Myen hpyen ni mungshawa ni hpe hkrup mara rim sat
KIA Masat (11) Dap Ba ginra, Shwegu hpyen man maga de, gumshem Myen hpyen ni mungshawa masha ni hpe hkrup mara rim sat nga ai lam, ginra masha ni kaw na chye lu ai.
June shata praw kaw nna, hpyen n-gun tsa kaba hte htu shadut lung wa ai gumshem Myen hpyen ni gaw, June shata 13 ya shani hta Shwegu makau Shwebungmyint mare na mungshawa masha ni hpe mara kata rim zing-ri sat ai yawng marai (9) rai sai lam, shawng lam na lit nga ai salang ni kaw na chye lu ai.
Gumshem Myen hpyen ni gaw, laknak kaba, drone, Jet nbungli hte Y-12 nbungli ni hte mungshawa ni nga mare de hkrum mara gap gasat ai majaw, mungshawa ni hkra hkala asak si sum ai sha n-ga, dum nta nawku jawng ni mung hten za ma sai lam chye lu ai.
Ya na zawn mungshawa masha ni hpe gumshem Myen hpyen ni hkrup mara rim zing-ri sat wa na hpe tsang ai majaw, June shata praw 8 ya shani hta KIA ni ndau laika shapraw da sai re.
June shata 17 ya shani hta mung, K-PDF ni kaw nna, mungshawa ni hpe sadi maja let hkawmsa na hte gumshem Myen hpyen ni hpe tsan tsan koi yen na matu sadi jaw ndau laika matut shapraw da ai hpe mu chye lu ai.
Ya aten Shwegu hpyen de shani shagu ngu na gasat gala majan byin nga ai rai nna, Manmaw hpyen man hte Waimaw hpyen man maga de mung, hpyen masa shaja hkat nga ding yang re lam, shawng lam na lit nga ai salang ni kaw na chye lu ai.
Rakhine mungdaw de mung, shani shagu ngu na gasat gala majan byin nga ai hta gumshem Myen hpyen ni a, nbungli bawm majaw mungshawa mash ani law law asak si sum ai sha n-ga, dum nta ni law law hten za hkrum nga ai hpe mung chye lu ai.
