Pawng hpawm hkungran ga shaka la akyu hpyi hpawng galaw
Wunpawng Mungdan Shanglawt Asuya kaw nna, lam masan ya ai kata hta hkungran lakmat rai nlu la shi ai magam gun dinghku ni hpe pawng hpawm hkungran ga shaka jaw ya ai akyu hpyi hpawng hpe April shata 10 ya jahpawt hkying 10:00am aten hta Laiza Muklum kaw galaw ya ai lam chye lu ai.
Hkungran lakmat jaw ai hpawng hpe Ja Htu Kawng mare RCM nawku jawng kaw htinggaw (10), Laiza Muklum Lahta Tsang Jawng Gawknu kaw htinggaw (46) hte Laiza Muklum Asuya Tara Rung kaw htinggaw (4) yawng htinggaw (60) hpe hkungran ga shaka la ya ai re lam chye lu ai.
Wunpawng Mungdan Shanglawt Asuya kaw nna ya na zawn galaw ya ai a yaw shada lam gaw, hkristan kun dinghku gaw de let Wunpawng Amyu law htam mayat maya wa na matu, anhte amyu ni a masha jahpan hpe rawt malan garai nhpang shi ai aten hte dai ni na aten hpe shingdaw maram wa yu ai shaloi, mayat maya grai hpang hkrat wa ai, kaga anhte hte rau nga ai amyu ni grai law jat wa ai a majaw, galaw ya ai re lam poi shabyin shatai komiti ni kaw na chye lu ai.
Rawt malan aten masa lam amyu myu a majaw, hkungran ga shaka nlu la ai magam gun dinghku ni hpe Wunpawng Mungdan Shanglawt Asuya kaw nna, dinghku law law hpe hkungran ya ai gaw, laiwa sai 2018 ning hta htinggaw (46), 2020 ning hta htinggaw (77), dai ning 2026 ning hta htinggaw (60) yawng htinggaw (183) hpe galaw ya sai re hpe chye lu ai.
Ndai pawng hpawm hkungran poi hte seng nna, Ginjaw Komiti Tingnyang Up lam masan ya ai kata, Ninggawn Daju Komiti hpe lit jaw nna shabyin shatai komiti hpaw ai hte pawng hpawm hkungran poi shabyin shatai komiti ta tut lit la ai hte galaw ya ai re lam rai nga ai.
