Shwegu ginra gasat gala majan matut byin nga
KIA Masat (11) Dap Ba, Masat (12) Dap Dung, Shwegu ginra hta gasat gala majan matut byin nga ai lam chye lu ai.
June shata 22 ya shani du hkra, Shwegu ginra hta KIA pawng hpawm hpyen hpung ni hte gumshem Myen hpyen dap ni gasat gala majan matut manoi byin nga ai lam, shawnglam lit nga ai salang langai tsun ai.
Gasat gala majan gaw ding yang matut manoi byin nga ai, gumshem Myen hpyen dap maga shani shagu nbungli hte wa gap gasat ai, drone, laknak kaba ni hte gap gasat ai lam ni ding yang galaw nga ai, ya aten lahkawng maga hpyen masa shaja hkat nga ding yang re, nga nna salang wa matut tsun ai.
Gasat gala majan byin taw nga ai, Shwegu ginra kata nga ai mungshawa ni hpe KIA kawn, hprawng koi yen na matu ndau laika shapraw da ai lam ni nga ai raitim, nkau mungshawa ni sha hprawng koi yen nna, nkau mungshawa ni gaw hprawng koi yen ai lam nnga ai, June shata 22 ya shani gaw gumshem Myen hpyen dap ni gap dat ai laknak kaba si, ပင္စင္ကုန္း lawk kaw wa hkrat kapaw nna, mungshawa langai asak si sum mat ai lam nga ai hpe chye lu ai.
Ya aten Shwegu ginra hta gumshem Myen hpyen dap hte P.T.Ts pawng hpawm hpyen hpung ni gaw, hpyen shamu shamawt htu shadut ai lam ding yang galaw nga ai sha n-ga, nbungli, laknak kaba ni hte mung shani shagu gap gasat ai lam ni galaw nga ai majaw, gasat gala majan gaw matut manoi byin taw nga ai hpe chye lu ai.
