Gumshem Myen hpyen dap a, nbungli langai hpe KIA ni gap jahkrat kau lu

Gumshem Myen hpyen dap a, hpyen lang arung arai hte malu masha htaw sa wa ai Helicopter nbungli langai hpe, January shata praw (3) ya shani hkying 11:50pm aten daram hta KIA ni gap jahkrat kau ya lu ai lam chye lu ai.

Myitkyina kaw nna, Na Hpaw gumshem Myen hpyen dap de pyen sa wa ai Helicopter nbungli (2) kaw na langai hpe KIA ni gap jahkrat kau ya ai lam, shawng lam na lit nga ai ni kaw na chye lu ai.

Nbungli hkrat kapaw ai hpang Jet Fighter (2) hte hpyen kai chyan nbungli langai gaw, nbungli hkrat kapaw ai makau shara hkan sa pyen gawai nhtawm, KIA ni nga na shadu ai maga de Rocket hte 4 lang gap bun nna bai nhtang mat wa ai lam chye lu ai.

Dai na maga hkying 5:13pm aten daram hta mung, Laisin Pa Jau Bum maga de, Tada Oo na rawt wa ai Jet Fighter 2 hte bawm wa jahkrat bun kau da ai lam, buga masha langai tsun dan ai kaw na chye lu ai.