Lung Sha Yang gumshem Myen hpyen dap ni laiwa laisa mungshawa ni hpe san jep nga

Putao Ginwang, Lung Sha Yang mare kaw kalang bai shara wa jahkrat nga ai, gumshem Myen hpyen dap ni lam kaba ntsa kaw gate galaw nna, 2023 ning December shata htum wa maga kaw na laiwa laisa mungshawa, modo ni hpe san jep ai lam galaw nga ai hpe chye lu ai.

Laiwa laisa modo ni sha n-ga, ntsen nhten ai mungshawa ni hpe ma san jep ai lam galaw ai, mare kata nga ai mungshawa ni hpe mung, nam de pru hkawm ai lam n galaw lu na matu tsun da ai lam, ginra masha langai tsun ai.

Ndai zawn gumshem Myen hpyen dap ni shagyip shagyeng ai lam hku tsun da ai majaw, mare kata nga ai mungshawa ni wanglu wanglang pru hkawm sa na matu yakhkak nga ai sha n-ga, byin wa na manghkang ni hpe gumshem Myen hpyen dap ni lit nlu la ai nga nna tsun da ai hpe ginra masha matut tsun ai.

Ndai hpyen dap gaw, lai wa sai masum ning daram hta gumshem Myen hpyen dap ni tawn kau da ai hpyen dap dingsa rai nna, 2023 ning December shata kaw na kalang bai gumshem Myen hpyen dap ni shara wa jahkrat nga ai hta ya aten hpyen n-gun 70 daram nga ai hpe chye lu ai.

Lung Sha Yang mare gaw Myitkyina hte Putao lam ntsa na mare rai nna, dai mare hta mungshawa yawng hkying mali jan daram nga ai re hpe chye lu ai.