Gumshem Myen hpyen dap langai hpe KIA pawng hpawm hpung ni gasat zing madu la

Mungmyit Sinli Ga (Kachin Sub-state) ginra, Mungmyit Ginwang kaw dap jung shara jahkrat nga ai, gumshem Myen hpyen dap langai hpe KIA, K-PDF hte ABSDF pawng hpawm hpyen hpung ni gasat zing madu la lu ai lam chye lu ai.

Mungmyit Ginwang, Manbat mare kaw dap jung nga ai, gumshem Myen hpyen dap Hk.L.Y (276) dap hpe, January shata praw (1) ya jahpawt hkying 6:45am aten daram kaw nna, KIA Masat (4) Dap Ba, Masat (34) Dap Dung kata na pawng hpawng hpyen hpung ni htim gasat ai re lam, shawng lam na lit nga ai salang langai tsun ai.

KIA, PDF pawng hpawm hpyen hpung ni jahpawt hkying 6:45am aten kaw na htim gasat ai hpang hkying 8:50am aten daram hta atsai sha zing madu la lu sai hte gumshem Myen hpyen dap maga si hkala law ai lam, salang wa matut tsun ai.

Putao Ginwang, KIA Masat (1) Dap Ba, Masat (7) Dap Dung ginra, Hkrang Hti Dam gumshem Myen hpyen dap hpe mung, January shata praw (2) ya jahpawt hkying 9:00am aten daram kaw nna, KIA ni sa htim gasat ai lam, ginra shiga lawk kaw na chye lu ai.

Mungmyit Sinli Ga ginra hte Jinghpaw Mung ginra ni hta gumshem Myen hpyen dap hte KIA ni shani shagu ngu nga gasat gala majan laja lana byin nga ai hta gumshem Myen hpyen dap ni gaw, nbungli bawm ni jahkrat bun nga ai sha n-ga, laknak kaba ni hte mungshawa ni nga ai shara de hkrup mara gap shadam bun ai majaw, mungshawa law law si hkala ai hte dum nta ni mung wan hkru hten za ma sai lam chye lu ai.