KIA hte gumshem Myen hpyen dap ni gasat gala majan byin

KIA Masat (9) Dap Ba, Masat (26) Dap Dung ginra, Sezin mare makau kaw April shata 17 ya jahpawt hkying 4:ooam aten hta gumshem Myen hpyen dap, SNA hpyen dap pawng hpawm hpyen hpung ni hte KIA hpyen hpung ni gasat gala majan byin ai hta KIA ni dap zing la lu sai lam na chye lu ai.

Sezin mare makau na Nam Daram hta dap jung nga ai gumshem Myen hpyen dap hte SNA dap ni hpe KIA hpyen hpung ni hku nna, hkying 5:25am aten kaw dap hpe gasat zing la lu sai re lam chye lu ai.

Mungmyit Sinli Ga, KIA Masat (6) Dap Ba, Masat (9) Dap Dung ginra, Muse Balik Dap hte Nova KTV shara lahkawng kaw, April shata 16 ya shana hkying 8:30pm aten laman hta PDF ni sa gap ai kawn gasat poi byin ai lam na chye lu ai.

April shata 15 ya shana hkying 8:10pm aten hta mung Namdu ကြံ့ခိုင် ေရးပါတီရုံး shawng kaw mying nchye ai La 1, 125 cycle (1) hte lai wa nna, pala tum nlawm ai bawm 1 sa kabai kapaw ai lam mung nga ai re lam chye lu ai.