Manmaw Ginwang hte Shwe Gu Ginwang ni hta Dumsu hte Uloi ni kaw yuhkaw ga ai ana byin nna si ai law wa

Manmaw Ginwang, Manje Ginwang Daw hte Shwe Gu Ginwang ni hta Dumsu hte Uloi ni kaw yuhkraw ga ai ana byin nna si ai law wa ai lam, buga masha ni kaw na chye lu ai.

Manje Gumse Nga hpaga dabang hta gaw, September shata praw 1 ya shani kaw nna, dai ni September shata praw 3 ya shani du hkra rai yang, Nga Uloi 6 si sai lam, Manje mare na salang langai tsun ai re.

Ndai ana gaw dusat tsi sara ni tsun yang yuhkraw ga ai ana re nga ma ai, tsi kalang htu yang kyats hkying 5000 a, lahta jaw ra ai, tsi htu ngut ai raitim si mat ai. Ndai ana byin wa ai lam gaw, Nga hpaga galaw ai ni kaw na byin hpang wa ai rai nna, September shata praw kaw nna sha byin wa ai re lam, salang wa matut tsun ai.

Ndai zawn re ana ni, Shwegu Ginwang, Gawng Run mare, Munghkawng Hka Pra Yang mare, Nawnghkun Pa hte Kagam Pa mare hkan na, Dumsu Uloi ni mung, nta langai mi hta na 8 daram si nga ai lam chye lu ai.

Lai wa sai 2017 ning hkan gaw, lahkru hpye ai n-gup kahpraw ai shinglet kahpraw ai zawn re ni byin lai sai raitim, ndai ni hpe gaw tsi htu nna shamai lu ai lam nga ai, ya byin ai ana gaw tsi htu tim nmai tsi mat ai lam nga ai.

Lai wa sai 2022 ning hta mung, Putao ginra, Kawng Kahtawng kaw dumsu ana byin wa ai hta hkum ting lapau hpye wa ai hkang kaw byet shang nna shi hkrai shi si mat ai lam ni byin lai sai hpe mung chye lu ai.