Myen hpyen ni mungmasha langai hpe mara kata gap sat kau

Ka Mai mare lahta Ma U Pin mare kaw nga ai Myen hpyen ni gaw, January praw 2 ya jahpawt hkying 6:40am aten hta Ma U Pin mare na Salang Tangbau Yaw Htung asak 42 ning hpe mara kata gap sat kau ai lam, buga na salang langai shana wa ai.

Mabyin hte seng nna salang wa tsun ai hta, “Salang Tangbau Yaw Htung shi gaw nta kaw yup ai hkying 6:40am aten du yang namdum sa mayu ai nga nna dat wan hte mai sau ni hpai nna namdum de sa wa ai, namdum rai ndu yang, shi nta makau kaw nga ai Myen hpyen ni gap kau dat ai, shi gaw marawn nna shi nta lakang pawt kaw du ai hte nsa hti mat ai” nga nna salang wa tsun ai.

Myen hpyen ni gaw ya na zawn gap kau hkrup ai majaw, madu jan hpe gumhpraw Kyats 500,000 ( Sen Manga ) sa jaw da ai rai nna, moi mang hpe daini January praw 3 ya shani makoi mayang akyu hpyi hpawng galaw na re lam salang wa tsun ai.

Ma U Pin mare hta Sam Hkyeng Pyi Tu Tsit ( P.T.Ts ) hte Myen hpyen dap Hk.L.Y ( 252, 256 ) dap ni pawnghpawm shamu shamawt nga ai shara re lam chye lu ai.