Shwe Li Wunpawng Ramma Hpung kaw na, Wunpawng Ramma ni hpe Miwa mung de bungli tam ya ai lam galaw sa wa na

Shwe Li Wunpawng Ramma Hpung kaw nna, Wunpawng ramma ni hpe Miwa Gumsan Mungdan de bungli sa galaw ai ramma ni a matu, bungli tam, lam madun ya ai lam ni hpe galaw sa wa na re lam chye lu ai.

Ndai lam hte seng nna Sak Hkung Mungdaw, Yunan Ginwang, Shwe Li Ginwang Wunpawng Ramma Ningbaw Sara. Zatau Ah Dau sanglang tsun dan ai hta

“Anhte Shwe Li Wunpawng Ramma Hpung hku na law law mu mada mat wa ai, anhte Jinghpaw ni ndai kaw du ai ten hta bungli galaw ai, gumhpraw nlu la ai, matsan mayan rai byin hkrum sha ai myi tut paran wa ai lam ni grai nga wa ai, Miwa Mung de bungli galaw na matu shang wa ai anhte Wunpawng Amyusha ni hpe e, mayak manghkang hpa nnga hkra, lama na bungli langai kaw bungli sa galaw na rai yang anhte ndai bungli madu hte bungli masha a lapran e ra ahkyak ai, tawn gying ai masat masa laika pa, hkying kade kaw na hkying kade du hkra galaw ai, shata kumhpa hpe gara hku sawn ya ai, ja gumhpraw hpyi ai ten hta mung mayak mang hkang nnga hkra dangdi dang dep ai daram makawp maga na, masha mat ai lam dut sha hkrum ai lam amyu myu grai nga ai re majaw, ndai zawn re lam ni nnga hkra makawp maga na” nga nna tsun ai.

Myen Mung Asuya hte Miwa Gumsan Mungdan lahkawng maga myit hkrum na galaw ai lam hta Myen Mung kata nga ai mung shawa ni Miwa Mungdan de bungli sa galaw ai lam hte mayak manghkang nnga hkra lam madun la ai re lam Sara matut tsun ai.

Bai nna Miwa Mung kata nga, laika pa ni galaw sa wa ai lam hta mung, seng ang ai Miwa Asuya rung hte seng ai laika pa ni hpe galaw ya ai lam, bungli tam ya ai lam, bungli madu ni gumhpraw njaw mat ai rai yang lu hkra bai hpyi ya ai zawn re lam amyu myu hpe lit la galaw sa wa na re lam chye lu ai.