Hpakant ginra hta nbungli hte bawm wa jahkrat gap gasat
Hpakant ginra hta gumshem Myen hpyen dap ni nbungli hte bawm wa jahkrat gap gasat ai lam chye lu ai.
April shata praw 9 ya shana daw hkying 2:07pm aten daram hta Hpakant Maw Mau Bum hte Sut Bum grup yin de gumshem Myen hpyen dap ni nbungli (2) hte bawm wa jahkrat gap gasat ai lam, ginra masha ni tsun ai.
Nbungli hte wa gap gasat ai majaw, mungshawa dum nta hten za mat ai lam ni nga ai rai nna, mungshawa hkra hkala ai lam nga nnga hpe nchye lu ai re.
Hpakant ginra hta April shata praw kawn, KIA pawng hpawm hpyen hpung ni hte gumshem Myen hpyen dap ni gasat gala majan bai byin wa ai hta gumshem Myen hpyen dap shara nkau hpe KIA pawng hpawm hpyen hpung ni gasat zing kau lu ai hpang, gumshem Myen hpyen dap ni gaw ya na zawn nbungli, laknak kaba ni hte gap gasat ai lam ding yang ngu na galaw nga ai sha n-ga, hpyen n-gun htu shadut jat bang ai lam ni mung galaw nga ai majaw, ya aten lahkawng maga hpyen masa shaja hkat nga ding yang re ai hpe chye lu ai.
Hpakant ginra hta KIA pawng hpawm hpyen hpung ni hte gumshem Myen hpyen dap ni gasat gala majan bai byin wa ai majaw, dai ginra na mungshawa ni tinang shimlum dum ai shara ni hta hpyen hprawng koi yen nga ai lam chye lu ai.
