Hpakant ginra kaw gasat gala majan laja nga
Hpakant KIA Masat (9) Dap Ba ginra hta gumshem Myen hpyen dap hte Pyi Tu Tsit pawng hpawm hpyen hpung ni hte KIA pawng hpawm hpyen hpung ni, April shata 11 ya jahpawt hkying 8:00am aten daram kaw nna gasat gala majan laja lana byin nga ai lam chye lu ai.
KIA pawng hpawm hpyen hpung ni shara la nga ai, Mashi Kahtawng akyuhpyi bum maga de, gumshem Myen hpyen dap hte Myin Ze Than (P.T.Ts) pawng hpawm hpyen hpung ni htu shadut lung wa ai majaw, laja lana gasat poi byin ai re lam, shawnglam na lit nga ai salang langai tsun ai.
Gasat poi laja nga ai Mashi Kahtawng akyuhpyi bum makau hte Sut Bum mayan kaw Humalin maga na lung wa ai Jet nbungli 3 hte bawm wa gap gasat ai lam nga ai, Hpakant Tatma kawng kaw nna mung, Mawwan kaji hte Mawwan kaba maga laknak kaba hkrup mara gap bun ai lam chye lu ai.
Laknak kaba gap bun ai hpang, gumshem Myen hpyen pawng hpawm ni lagaw lam bai htu shadut wa ai majaw hkying 4:30pm aten hta laja lana gasat poi matut byin ai lam chye lu ai.
Ya aten Manmaw hpyen man, Waimaw hpyen man, Kathar hpyen man hte Hpakant hpyen man shara ni hta hpyen masa shaja hkat nga ding yang rai nna, shani shagu ngu na gasat gala majan byin nga ai hpe mung chye lu ai.
