Putao ginra hta gasat gala majan byin
KIA Masat (1) Dap Ba, Masat (7) Dap Dung, Putao ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin ai lam chye lu ai.
April shata 26 ya shani hkying 10:30am aten daram hta Putao ginra Sum Pyi Yang grup yin de hpyen shamu shamawt hkawm nga ai gumshem Myen hpyen dap ni hpe KIA pawng hpawm hpyen hpung ni hkap shingla gap gasat ai kawn, gasat gala majan byin wa ai re lam, lit nga ai salang langai tsun ai.
Gumshem Myen hpyen dap n-gun 70 daram, Sum Pyi Yang mare grup yin de hpyen shamu shamawt hkawm nga ai aten, Wadat mare makau kaw KIA pawng hpawm hpyen hpung ni hkap shingla gap gasat ai hta gumshem Myen hpyen dap maga si hkala law ai hte bai hting nut mat wa ai re lam chye lu ai.
Ya aten KIA Masat (1, 2, 3, 9) Dap Ba ginra ni hta gumshem Myen hpyen dap ni hte KIA pawng hpawm hpyen hpung ni shani shagu ngu na gasat gala majan byin nga ai rai nna, lahkawng maga hpyen masa shaja hkat nga ding yang re ai lam chye lu ai.
