Hpakant ginra Myen hpyen dap ni mungshawa arung arai hpe mya lu mya la ai lam galaw nga

Gasat gala majan laja lana matut byin nga ai, Hpakant ginra hta gumshem Myen hpyen dap ni mungshawa ni a manu dan ai arung arai, ja gumhpraw sut gan ni hpe mya lu mya la ai lam galaw nga ai hpe chye lu ai.

May shata 11 ya shani hta Hpakant Lawnghkang mare na Hotel ni hkan, gumshem Myen hpyen dap ni shang nna, manu dan ai ja gumhpraw arung arai, lung seng ni la mat wa ya ai sha n-ga, Mawsiza mare na sau seng langai kaw na gumhpraw ni hpe mung la mat wa ya ai re lam, ginra masha ni tsun ai.

Gasat gala majan a majaw, dai ginra na mungshawa nkau gaw tinang shimlum dum ai shara ni hkan hpyen hprawng koi yen nga ai aten, ya na zawn gumshem Myen hpyen dap ni mungshawa ni a manu dan ai arung arai ni hpe mya lu mya la kau ya ai majaw, mungshawa ni myit yawn hken hkrum nga ai hpe chye lu ai.

Ya aten gumshem Myen hpyen dap gaw, Hpakant ginra hta hpyen n-gun kaba hte htu shadut shara la ai lam ni galaw nga ai majaw, gasat gala majan mung matut manoi byin nga ai rai nna, dai ginra na mungshawa ni mung, sadi maja let sha hkawmsa nga ra ai re lam chye lu ai.