Shwegu ginra gasat gala majan byin nga
KIA Masat (11) Dap Ba, Masat (12) Dap Dung, Shwegu ginra hta gasat gala majan byin nga ai lam chye lu ai.
June shata praw 9 ya jahpawt hkying 7:30am aten daram kaw nna, Shwegu ginra hta KIA pawng hpawm hpyen hpung ni hte gumshem Myen hpyen dap ni gasat gala majan byin nga ai lam, lit nga ai salang ni tsun ai.
Gasat gala majan byin nga ai hta Shwegu Muklum kata dap jung nga ai gumshem Myen hpyen Hk.L.Y (56) dap ni kawn, gasat gala majan nbyin ai shara hkan raitim, laknak kaba hkrup mara gap shadam bun ai lam ni galaw nga ai rai nna, lahkawng maga laknak kaji kaba drone ni hte gap gasat hkat nga ai lam chye lu ai.
Ya aten Shwegu Muklum kata nga ai mungshawa ni hprawng yen na hte Shwegu Nga-Oo lam kaba hpe gan pat na lam KIA Masat (12) Dap Dung ni ndau da ai rai nna gasat gala majan mung, shani shagu ngu na byin nga ai hpe chye lu ai.
