Mai Ja Yang Muklum kata hpaw tawn ai madang tsaw jawng ni hta jawng lung mayu ai jawngma ni garum ningtum shawk shawn mai
Mai Ja Yang Muklum kata hpaw tawn da ai madang tsaw jawng ni hta 2026-2027 hpaji ladaw hta jawng lung na jawngma ni, jawng lung jarik hpe shawk shawn mai ai lam chye lu ai.
Mai Ja Yang Muklum kaw hpaw tawn ai, Institute of Liberal Arts and Sciences, Mai Ja Yang Institute of Education, Mai Ja Yang College, hte Federal Law Academy jawng ni hta jawng lung mayu ai jawngma ni hte jawng lung na matu hkyen shajin nga ai jawngma ni, jawng lung jarik hte jawng boarder jarik hpe World Kachin Congress (WKC) kaw June shata 17 ya shani kaw nna July shata 14 ya laman, shawk shawn wa mai ai lam, WKC ndau da ai re.
Shawk Shawn wa ai jawngma ni gaw, 2026-2027 hpaji ladaw hta jawng lung na matu hkyen lajang nga ai ni sha shawk shawn mai ai, kaga kadai kaw nna mung garum ningtum nlu la ai ni rai ra na hte Wunpawng Mungdan hte amyu sha gawgap ai magam bungli ni hta ta tut shanglawm shakut na ni rai ra na lam chye lu ai.
Online hku nna shawk shawn form hpe hpaji@wkckachin.org shing nrai, WKC Facebook Page hta download la mai ai hte Mai Ja Yang karum zinghkri (KRZ) rung hta mung sa la nna, shawk shawn wa mai ai lam chye lu ai.
WKC gaw lai wa sai 2021-2022 hpaji ladaw kaw nna, ja gumhpraw yakhkak nga ai jawngma ni hpe jawng lung jarik hte boarder jarik ni hpe madi shadaw garum jaw nga ai wuhpung wuhpawng re ai hpe chye lu ai.
