Ka-ni nang hpam dawn dabang hpaw hpawng galaw
Sinpraw Dingdung Ginwang Ginjaw, Hpyi Maw ginra Galam mare kata hpaw tawn ai, Gying Yung ka-ni nang hpam dawn dabang hpaw hpawng lamang hpe July shata 13 ya shani galaw la lu sai lam chye lu ai.
Hpawng hta Sinpraw Dingdung Ginwang Ginjaw, Pat Jasat Komiti Amu Madu, Salang KabaWangde Gyung Tse kawn tsun sanglang dan ai hta
“Anhte Wunpawng amyu sha ni mungdan sha ni, majan nhpan kata hta asak ap nawng ai, hkum hkrang daw chyen ap nawng ai nga na re, raitim grau nna hkrat sum shangun ai, si sum shangun ai gaw ka-ni nang hpam rai nga ai, ndai ka-ni nang hpam a majaw anhte amyu sha ni mungdan sha ni nsi ging ai kaw si ai, si ai jahpan grai tsaw nga ai dai re ai majaw, dai ni na zawn rai na mungdan asuya kaw nna masing jahkrat rai nna, tinang a mungchying mungshawa ni hpe ka-ni dawn ya ai lam re” nga nna tsun ai.
Ya aten ka-ni nang hpam dawn jasan hkam la na marai (60) du nga sai rai nna, ka-ni dawn hkamla na ni hpe shinggyim nga sat nga sa lam, ka-ni nang hpam a labau, yu bak mara a lam, galai shai sak hkrung lam, chyum laika hte ngarai mung a lam, hkristan ding hku a lam, akyu hpyi ai lam, hkye hkrang la ai lam, hkamja lam hte KIO a masa lam ni hpe sharin ya ai re lam chye lu ai.
Ya na zawn dawn dabang hpaw ai lam gaw, Sinpraw Dingdung Ginwang Ginjaw kata ka-ni nang hpam dut sha masha hte lu sha ai masha ni law law nga ai majaw, lu sha masha ni hpe dawn jasan ya lu na matu yaw shada let hpaw sa wa ai rai nna, hpawng hta Magam Dap, Makan Dap hkan na magam gun ni, nawku hpung woi sara ni hte mungshawa ni sa du shanglam ai hte galaw la lu sai lam chye lu ai.
