Myitkyina ginra kata ka-ni nang hpam lu sha dut mari hpaga galaw ai lam grau sawng wa

Myitkyina ginra kata ka-ni nang hpam lu sha dut mari hpaga galaw ai lam lani hte lani grau sawng wa nga ai hpe chye lu ai.

Ka-ni nang hpam hpe lam maw kaba ntsa wang lu wang lang lu sha dut mari hpaga galaw ai lam lani hte lani grau grau sawng wa nga ai hta grau nna, Rambo lawk gaw ka-ni nang hpam lu sha dut mari hpaga galaw ai lam grau sawng nga ai re lam, ginra masha ni tsun ai.

Ndai zawn ka-ni nang hpam hpe wang lu wang lang lu sha dut mari hpaga galaw nga ai majaw, seng ang ai rung ni de tsun shiga jaw ai lam ni nga ai raitim, kadai mung ahkyak la ya ai lam nnga ai hta n-ga, gumshem Myen hpyen dap magam gun ni nan mung dut jaw nga ai re lam, ginra masha ni matut tsun ai.

Myitkyina ginra kata ya na zawn ka-ni nang hpam hpe wang lu wang lang lu sha dut mari hpaga galaw wa ai gaw, gumshem Myen hpyen dap ni mungdan daru magam ahkang aya zing madu kau ai hpang kaw na lani hte lani grau sawng wa nga ai rai nna, Muklum kata lagu lagut mya lu mya la gumhpraw kashun ai lam mung, jahkring hkring byin nga ai majaw, mungshwa ni hkawmsa hkawmwa ai lam hta shadi maja nna hkawmsa nga ra ai re lam chye lu ai.