Hpaji Du jawng yu hpawng galaw

Diploma In Educational Studies Hpaji Du jawng yu hpawng hpe March shata 22 ya shani hkying 10:00am aten hta Mai Ja Yang Institude Of Education (MIEd) jawng gawknu kaw galaw la lu sai lam chye lu ai.

Diploma In Educational Studies Hpaji Du jawng hpe Wunpawng Mungdan Shanglawt Asuya, Ginjaw Hpaji Dap kaw nna lam masan ya ai hte shawng nnan lang hpaw sharin sa wa ai program re hpe chye lu ai.

Ndai jawng hta Ginwang Ginjaw shagu de na hpaji du magam bungli hta (5) ning lahta magam gun hpai sai ni hpe madung sharin hpung jat ya ai lam rai nna, shanhte a dinghkrai rawt jat lam hte hpaji lam woi awn hparan hpareng lam hta grau nna tang du na matu, yaw shada let galaw ai re lam, Mai Ja Yang Institute Of Education (MIEd) jawng up tsun ai.

Diploma In Educational Studies Hpaji Du jawng hpe sharin ladaw (2) ning masat nna sharin sa wa ai hta Diploma janmau hkam la sai jawngma yawng marai (18) rai nna, ndai program hpe matut manoi sharin mat wa na re hpe matut chye lu ai.