Se Zin Myen dap hpe KIA ni htim gasat padang dip la

KIA Masat (9) Dap Ba ginra, Hpakant Se Zin gumshem Myen hpyen dap hpe KIA ni htim gasat padang dip la lu sai lam chye lu ai.

Hpakant, Se Zin mare kaw dap jung nga ai, gumshem Myen hpyen Hk.M.Y (116) dap hpe KIA pawng hpawm hpyen hpung ni April shata 24 ya jahpawt hkying 1:00am aten daram hta padang dip la lu sai lam, lit nga ai salang ni kaw na chye lu ai.

Se Zin gumshem Myen hpyen dap hpe KIA pawng hpawm hpyen hpung ni, lai wa sai April shata 20 ya shani kaw na htim gasat hpang wa ai rai nna, gasat gala majan byin nga ai ten gumshem Myen hpyen dap nbungli bawm, laknak kaba ni hte gap garum ya ai lam ni nga ai raitim, padang dip la lu sai lam chye lu ai.

Matut nna, Hpakant ပန္းတင္ mahkrai kaw gumshem Myen hpyen dap ni laiwa lasai mungshawa ni a modo, cycle ni hpe laja lana jep ai lam ni galaw nga ai hpe chye lu ai.

Ya aten Hpakant ginra hta KIA hte gumshem Myen hpyen dap lapran hpyen masa shaja hkat nga ai rai nna, gasat gala majan mung matut byin wa mai ai lam chye lu ai.