Nam Ya Myen dap hpe KIA ni htim gasat zing madu la

KIA Masat (9) Dap Ba, Hpakant Ginwang, Nam Ya gumshem Myen hpyen dap hpe KIA ni htim gasat zing madu la lu sai lam chye lu ai.

Myitkyina, Hpakant lam Nam Ya mare kaw dap jung nga ai, gumshem Myen hpyen dap hpe KIA pawng hpawm hpyen hpung ni April shata 11 ya jahpawt hkying 6:00am aten daram hta htim gasat zing madu la lu sai lam, lit nga ai salang langai tsun ai.

Nam Ya gumshem Myen hpyen dap hpe April shata praw 9 ya shani kaw na htim gasat hpang wa ai hta dai ni April 11 ya jahpawt zing madu la lu sai rai nna, laknak arung arai hte Myen hpyenla nkau hpe mung lu rim la ai lam, salang wa matut tsun ai.

Gasat gala majan byin nga ai ten gumshem Myen hpyen dap nbungli bawm, laknak kaba ni hte gap bun ai majaw, Nam Ya mung mare masha ni a dum nta nkau hten za hkrum ai lam ni nga ai hpe matut chye lu ai.

Nam Ya gumshem Myen hpyen dap gaw Hpakant hte Myitkyina lam kaba ntsa gate tawn let, laiwa laisa mung shawa ni hpe ahkun hkangse hta sha ai shara re hpe mung chye lu ai.