Wa Jau langai hpe kadai re nchye masha ni sinat hte wa gap kau da

Monyin Jau Ginwang na Wa Jau Paul Khwi Shane Awng hpe kadai re nchye ai masha ni sinat hte wa gap kau da ai lam chye lu ai.

April shata 12 ya jahpawt hkying 7:00am aten daram hta Monyin Jau Ginwang na Wa Jau Paul Khwi Shane Awng gaw, Misa hkungga nawng jau nga ai ten, kadai re nchye masha marai (2) nawku jawng kata shang wa nna, sinat kadun hte wa gap kau da ai lam chye lu ai.

Kan kaw (2) lang, hkra lata hte myi man kaw katset hkra nna, ningma sawng ai majaw, Monyin tsi rung kaba kaw tsi tsi hkamla nna, ya aten Myitkyina tsi rung kaba de du wa sai re lam na chye lu ai.

Matut nna April shata 11 ya shana hkying 7:00pm aten daram hta Kamaing, Lawa lam numbraw shagyit kaw, shagyit sin ai Sam Hkyeng P.T.Ts ni, Kamaing Lamawng kahtawng na, Slg. Jangmaw Tu Awng asak (37) hpe gap sat kau ai lam, ginra masha ni kaw na chye lu ai.

Lai wa sai March shata 18 ya shani hta mung, Namti Lam Braw Yang kaw na Sara langai hpe kadai re nchye masha marai 3 sa gap sat kau da ai mabyin ni byin lai wa sai re.