Nawng E Hku jawng a tsang (12) jawng yu poi shagrau sha-a hpawng galaw

Sama Gingwang, Nawng E Hku Sasana Lahta Tsang Jawng a (3) lang ngu na tsang (12) jawng yu poi shagrau sha-a hpawng hpe March shata praw 5 ya jahpawt hkying 9:00am aten hta Nawng E Hku lahta tsang jawng kaw galaw la lu sai.

Tsang (12) jawng a lam hte seng nna, Nawng E Hku Lahta Tsang Jawng Up, Sara Kaba Maji Naw Hkawng tsun ai hta

“Anhte ndai jawng kaw tsang (12) hpe mungkan a madang dep ai hku na GED program hpe galaw ai hku re, GED program san poi hpe anhte jawng kaw mai htai wa na hku shakut nga ai, dai gaw mungkan madang dep ai hku sa wa ai lam re, bai na maga mi gaw jawng kaw na nan, dai ni na zawn tsang (12) awng lekmat hpe shagreng mat wa na matu re, ndai jawng kaw tsang (12) ngut ai jawngma ni mungkan a tsang (12) madang hte hkrak re hku na sa wa na matut shakut nga ding yang re” nga nna tsun ai.

Tsang (12) ninggam hta ginhkan 8 hpe sharin ya ai hta program hku na English hte Miwa hpe sharin ya ai rai nna, dai ni jawng yu lekmat shagrau hkamla sai jawngma yawng marai 47 re hpe chye lu ai.

Nawng E Hku lahta tsang jawng hta tsang (12) ninggam hpe lai wa sai 2020 ning kaw na hpaw sharin sa wa ai hta dai ning gaw 2022-2023, 2023-2024 hpaji ladaw a tsang (12) jawng yu hpawng rai nna, tsang (12) jawng yu sai jawngma yawng marai 150 daram nga sai lam chye lu ai.

Matut nna, Nawng E Hku lahta tsang jawng hta KG kaw na tsang (12) du hkra hpaw sharin nga ai rai nna, du wa na hpaji ladaw hta Music Diploma program hte Japan program ni hpe mung, matut sharin sa mat wa na re lam chye lu ai.