Sara Kaba Hkalam Samson hpe bai dat ya

Gumshem Myen hpyen dap ni mara kata rim, htawng bang tawn da ai, Sara Kaba Hkalam Samson hpe bai dat ya sai lam chye lu ai.

KBC Ningbaw Usa Sara Kaba Rev. Dr Hkalam Samson hpe April shata 17 ya shani hkying 1:00pm aten daram hta gumshem Myen hpyen dap ni mara kata rim, htawng bang tawn da ai kaw na bai dat ya sai re.

April shata 17 ya shani gaw Myen amyu sha ni a shaning nnan rai ai hta Myen mungdan ting hta nga ai hkyuk htawng kata htawng rawng hkrum nga ai ni hpe shalawt dat ai kaw, Sara Kaba mung lawt pru wa ai re lam chye lu ai.

Sara Kaba hpe lai wa sai 2022 ning December shata 5 ya shani Mandalay nbungli daru kaw, gumshem Myen hpyen dap ni n tara ai hku rim woi mat wa ai rai nna, htawng rim bang tawn ai kaw na dai ni she lawt pru wa ai lam chye lu ai.