Yaw Yung Byuha kawng, Hpalang Kawng hte Nga Gyang gumshem Myen hpyen dap ni hpe matut gasat zingla lu

Sinpraw Ginwang Ginjaw, KIA Masat (3) Dap Ba ginra, Loi Je ntsa kaw dap jung nga ai, Yaw Yung Byuha kawng, Hpalang Kawng hte Nga Gyang gumshem Myen hpyen dap ni hpe, March shata 28 ya shani KIA pawng hpawm hpyen hpung ni padang dip gasat zingla lu sai lam chye lu ai.

Yaw Yung Byuha kawng kaw nga ai gumshem Myen hpyen ni gaw, mungshawa nga ai Mai Ja Yang Muklum maga de, laknak kaba hte jahkring hkring gap bang nga ai hpyen dap langai re.

Gasat poi laja lana byin nga ai ginra hta gumshem Myen hpyen dap ni, Y-8, Y-12 hte Jet Fighter nbungli kaw nna nsin nhtoi bawm ding yang jahkrat bun nga ai lam, shawng lam na lit nga salang ni tsun ai.

Ndai Yaw Yung gumshem Myen hpyen dap hpe lai wa sai 1985 ning March shata hta mung, KIA hte Myen Mung Communitst Party pawng hpawm nhtawm wa htim gasat ai raitim, nlu gasat zing ai sha bai htingnut ra mat ai lam chye lu ai.

Loi Je, Sinlum hte Nmawk lam mayan na gumshem Myen hpyen dap kaba rai nga ai, Yaw Yung Byuha hte Sinlum Byuha dap makawp ni hpe, March shata 27 ya shani kaw nna htim gasat ai hta lahkawng ya laman, Yaw Yung Bum, Shang Tai, Hpalang Bum, Bang Yau, Law Dan, Law Mun hte Nga Gyang gumshem Myen hpyen dap shara (7) hpe padang dip gasat zingla lu sai re.

Ya aten hta KIA Masat (1) Dap Ba, Masat (3) Dap Ba hte Masat 8 Dap Ba ginra ni hta gumshem Myen hpyen dap hte KIA ni laja lana gasat poi byin nga ai sha n-ga, hpyen masat mung shaja hkat nga ding yang re hpe mung chye lu ai.

၎

င

၎

၎