Loi Je, Sinlum hte Nmawk lam mayan na gumshem Myen hpyen dap hpe KIA pawng hpawm hpyen hpung ni htim gasat

Sinpraw Ginwang Ginjaw, KIA Masat (3) Dap Ba ginra, Loi Je, Sinlum lam mayan hta dap jung shara jahkrat nga ai, gumshem Myen hpyen dap hpe, March shata 27 ya jahpawt hkying 7:00am aten daram kaw nna, KIA pawng hpawm hpyen hpung ni htim gasat nga ai lam chye lu ai.

KIA pawng hpawm hpyen hpung ni htim gasat ai gumshem Myen hpyen dap ni gaw, Shang Tai Bum, Bang Yau, Byeng Wai, Hpalang Bum, Law Dan, Law Mun hte Nga Gyang dap ni rai nna, Yaw Yung Bum hte Sinlum Bum byuha dap makawp ni re.

Dai na maga hkying 3:30pm aten daram hta Shang Tai Bum, Law Mun hte Bang Yau Bum na hpyen dap shara (3) hpe padang dip gasat zingla lu ai lam, shawng lam na lit nga ai salang ni kaw na chye lu ai.

Yaw Yung Bum mayan de nga ai gumshem Myen hpyen dap ni laknak kaba hkrup mara gap shadam dat ai majaw, Mai Ja Yang Muklum makau grup yin shara ni hte Miwa hkran maga de mung sinat kaba si wa hkrat kapaw ai raitim, masha hkra hkala ai lam gaw nnga ai nga nna, Mai Ja Yang ginra masha ni tsun ai.

Gasat poi laja lana byin nga ai shara de, gumshem Myen hpyen ni nbunli bawm jahkrat bun ai lam ding yang galaw nga ai rai nna, dai na hkying 7:50pm aten daram kaw nna sinat kaba ni bai ngoi hpang nga sai hte Law Mun, Law Dan maga de Y-12 nbungli bawm jahkrat bun nga ai lam, buga masha ni kaw na chye lu ai.

March shata 26 ya shani hta mung, Manmaw Myitkyina lam mayan gumshem Myen hpyen dap rai nga ai, Kunglaw, Myothit, Salawng Kawng hte Lungja Udang Bum shara ni hpe gasat zingla lu ai re.

၎

င

၎

၎